|| Nach Cristes geburth Tusent jar drihu(n)dirt jar in deme sechs unde zcwencikste(n) jare an deme vrietage vor allerma(n)ne vasnacht2 trat Ludwig vo(n) Ludwigisdorf und sine husvrowe Cille unde sprache(n) Joh(ann)es vo(n) Ludwigisdorf, H(er)ma(n)nes sun, sine(n) garthe(n) an, der da lyet vor d(er) stat zcu der linkin hant do ma(n) geyt keyn Rychinbach, der selbe garthe wart Ludwige und Cille(n) vortelt unde qua(m) mit rechte(n) urteyle(n) vor geheter ba(n)g, do alle ding craft habe(n), an Richeres hant von Ludwig(es)dorf, der in wid(er) den vorgena(n)te(n) Joh(ann)es H(er)ma(n)nes sun rechtlech unde redelich hatte Coyft.

Des sint gezcug: Mertin der Richter, h[er] Ermenrich, Crista(n) vo(n) Grunow, Friczhe Ecel, Nicol(aus) Wyk(er), Joh(anne)s von Richinbach, Henr(ich) Sydil(mann)is, Walth(er) Glucke(n) die shepphen.