aEz hat vorsatzet Lushe, die Gertinne genant, mit willen Gunteri un(d) Mertines, irre sone, iren garthen, vor deme Steinthore gelehgen, mit deme Melzhuse, Jentshke, d(er) da ist Rulen son von Richenbach, vor zwenzig marg, un(d) da von sol sie geben zwey m(a)rg zcu Cinse des jares, der sol Jentshke habben un(d) die andere sin swestere in dem Closthere2, un(d) ist also gethedinget, wanne die vrowe die zwenzig wid(er) gibet Jentske, so sol ir erbe ledig sin, wanne ouch Jentsh sin geld wil wid(er) habben, so mag er den garthen vorcoyfen od(er) vorsatzen, so er recht mite begeht.a