Nitcze an der ecke hat off gebin sin(er) elichen husfrawen Margarethen hus u(n)nd hoff u(n)nd alliz, daz dory(n)ne ist u(n)nd dorczu geboren mag von hus rate, silberin gevese, is sy cleine adir groz, waz dory(n)ne ist mit 6 merczen1, daz ir dor an nymant schaden sal noch sy hindirn sal doran, Besundirn myne cleider, dy sal sy dorch myn(er) selen willen gebin. Do noch gebe ich ir off dy czw hube ackirs, dy eris vatirs gewest sin, mit poschen2 u(n)d mit wesin u(n)d mit allen zugehoru(n)gen, doran hindir ich sy nicht an den 200 schok, dy ich ir vor gegebin habe3, in keine wiz abe zu brechen. Dor noch gebe ich off Peter Nmeister, Peter Richer, Bader, Bernhard Roze daz do blibet obir daz, daz ich myne(m) wibe off gegebin habe, daz sy daz halden mit mynis wibis rate u(n)nd se wed(er) noch erem rote, wer abir, daz einer der vir abe ginge, so sulden dy dry eyn andir frunt kise(n)4 an dez virden stat mit my(n)nes wibes wille, wer abir, daz got obir uns beyden gebote, so getrûwe ich den egen(anten), daz sy daz gebin u(n)nd schicken noch uns(erer) sele selikeit. Dor noch sal man gebin 40 m(a)r(k) ern Johanze, mynes brudirs son, alzo daz zu bestellen, daz sy kome(n) zu eyme altare zu sent Peter5, siner swest(er) Claren ouch alz vil, sc(ilicet) 40 m(a)r(k), dy wile ich lebe, so wil ich mit dem myne(n) tun un(d) losen.