Her Heynrich von dem Salcze hat gegebin in jehegetim dinge sine(n) sone(n) Michaeli un(d) Helie das vorwerk, zcu Kunstinstorf gelegi(n), mit allem gerethe, als is lyt, czu eyme rechtem erbe.

Her hat ouch gegebin Agnetin, sin(er) tochter, das halbe vorwerk, gelegin vor senthe Niclaus thore, mit allem gerethe, als lyt, zcu eyme rechte(n) erbe in jeget[i]m dinge.

Otylia, h(er)n Heynrichs vrowe [von] dem Salcze, hat czwenczik marg of dem ganczi(n) vorwerke zcu Kunstinstorf noch h(er)n Heynriches tode.

Is hat ouch gegebin her Heynrich vo(n) deme Salcze sinis sonis kindir Apeczkin, Hannusen un(d) Nikil das andir halbe teyl des vorwergis of dem Steynwege in jegeti(m) dinge zcu eyme rechtin erbe.

Of dem selben teyl des vorwerkis hat Otilia, sine husvrowe, zcen marg noch hern Heynrich tode von dem Salcze.

Mit dirre sache hat her Heynrich vo(n) dem Salcze alle sine kindir vorsunit un(d) bericht(it) mit alle erim willen in jegetim dinge, das keyns mit dem andirn shal thedingen.

Wenne der selbe her Heynrich abe git, so nemi(n) dy sone das len bevor, was her donoch lest, das teilin alle sine kint gliche.

Des sint gezcuge: Heynrich den Richter, Gunczil von Bishowswerde, Thile Piscator, Petrus Kungishayn, Conradus de Shoninborn, Otto Mertini, Petrus Scriptora, Ticzko Richinbach, zcu der zchit zhepphi(n) warin.