aDarre, melzhůs, Borna

Laurencius, des Trutwines son, hat uf genůme(n) den halben hof, gelegen in der Nuen Stad2, von siner Můmen, di husvrowe waz Peczcoldes Smides, in jehetem dinge, und hat der selbe Laure[n]cius mit der sheppen geheyse und Rathe von dem selben halbenteil des hofes vorkoyft das wenege Melczhus und di darre halb mit eyme gange zců deme bůrne und den bůrn zců shepfene in das melczhus zců begisene Johannese der statscribere zcu eym rechten erbe mit dem rechte, als her is gehabet und besezzen hat, und do hat vor gelobet Gotfrid, sin vetter, das

her daz Melczhus sal entw(er)ren von aller ansprache, di Johannes der statscriber mochte gehaben umme daz melczhus von Kůnodes kind(er)e Shůrzeplathen vor jehetem dinge.